19 نوفمبر 2009

تشرد " .. من الذاكرة 1 "


فقط لأني قد اشتقت لطفولتي فسأكتب عنها..

مبدأياً هو ال يشوفني يقول عليا هادية ماشاء الله و نعمين لكن الحقيقة إن ده باطل يُنكَـر !
طيب ,رغم أني لا أحب الكتابه بالعامية إلا أنني سأضطر للكتابة بها و أمري لله..
..
ممم ربما نبدأ بأيام ما كنت ثورية حبتين أيام ابتدائي يعني..
نقدر نقول إن الموضوع خد حيز جامد شوية ف أيام الانتفاضة التانية سنة 2000 كنت تقريباً في
سنة سادسة ابتدائي و للأسف ! سنتها كانوا فصلوا البنات عن الولاد من بعد خامسة ابتدائي D: ,
يعني تنظيم العمل كان بنات بس إنما تنفيذه بيتم فيه إشراك ولاد تحت قيادة الأخت إيمان..

القائد إيمان دخل الفصل و اتلم على الشلة الجندي ر1 , ر2 , ر3 , ش , ن , أ ..تقريباً يعني..
ياجماعه ماينفعش نسكت كده.. العيال ف فلسطين ماسكين طوب وبيزألوا,
و احنا قاعدين ساكتين ! ماينفش يا جدعان....
طب انت رأيك إيه..بصوا بقى إحنا لازم نعمل حاجه و عشان ننظم الشغل لازم نجتمع في
مكان سري و عارفين لو حد عرف – طبعاً العيال سيحوا بعد كده كل أسرار العمل.. عيال بقى -
المهم هنجمع عند مين؟ ..  إيه رأيكوا عند الجندي " ش " بيته أقرب حد ..
خلاص متفقين بعد المدرسة كله على هناك , وف منتهى السرية سامعين؟؟..

في الوكر بقى..
الشلة قاعده بتتمكيج !!!
لا معلش نسيت ده كان يوم تاني.. ! D:

الجندي "ش" معلش اقفل الباب و لو عمو خبط نبقى نشوف و نفتح..
 بصوا يا جماعه احنا أول حاجه عاوزين نعمل ورق يفوَّق الناس منشورات يعني
و هنيجي الصبح بدري ف المدرسة قبل أي حد ما ييجي و نعلقها..
ها مين هيكتبها .. – رسيت عليا – طيب ها مين هيرسم..الجندي " ر1" ,طيب ..ها هنطبعهم فين؟؟
مش في أي حته لنتقفش..الجندي " ر3 " احنا عندنا أستوديو و ماكنة تصوير أنا هصورهملكوا
طب حلو إيه تاني..
العلَم يا ريس ..عاوزين نرسم علم إسرائيل و نحرقة ف المدرسة , طيب كده كويس
يا جماعه..بكره فيه مظاهرة هتطلع من قدام مدرسة.....الابتدائية بعد الضهر إن شاء الله
بنات و ولاد..وهنجوب بيها أرجاء المنطقة بإذن الله ..خلاص كده متفقين ..متفقين..
و ما تنسوش نجدد النية !!  D:
نمشي واحد واحد وماتنسوش السرية ثم السرية ثم السرية..

تاني يوم..
الصبح بدري كان كل الورق متوزع ومتلزق ع الفصول , وبعدها بشوية..كان متقطع !

فاكرين السرية؟؟
الأستاذ دخل..الجندي " ر1 " يا أستاذ أنا ال عملت كذا و البت "ر3 "هي ال صورت الورق و كنا مجتمعين ف وكر عندال البت " ش"..
و أنا هوللللع ..انتوا بتهببوا إيييييييه هو ده ال اتفقنا عليه!!!

المهم..
الظهر.. القائد..يلا يا عيااااال ع الحوش هنحرررررررررق العلم .. الجاز ياض و الكبريت يابت
ولع ولع ولع ..العلم اتولع و حرييييييييييقااااااااااه هيييييييييه - هبل , هبل, قمة الهبل -..
أوعى المديير.. زعق للعيال..القائد فين ؟؟..
فوق , ورا السور !
..
بعد الظهر.. كل المدرسة مظاهرررررررة يارجالة .. و ع القدس رايحين شهداء بالملايين
ويا اختي جمالي و أنا بهتف !! وورايا كله ولاد و بنات وأنا أأأأأأأأهتف
و العيال ورايا و ع القدس رايحين شهداء بالملايين.. إحساس بالمسئولية يا جدع ! ...
و جُبنا أرجاء المنطقة و عدينا محطة القطر.. و فجأة المظاهرة اتقلبت..
طبله بلدي وعربيه كارو و حصان ! وبنات وشباب مدارس التجارة اتلموا..
و هييييييييصة و على واحده ونص و ع القدس رايحين شهداء بالملايين !
واتقلبت المظاهرة لمسخرة !
..
طبعاً اتأكدنا إن مظاهراتنا عملت بلبلة..بدليل إن المدير زعق ف الطابور تاني يوم
و أنا على طربيزة الينج بونج بغني..يا مؤمنين بالسلام D:
..

فيما بعد..
يا جماعه ال بنعمله ده مش كفاية..
الجندي " ن " بصوا يا جماعه احنا هنروح فلسطين ..إيه انتي بتقولي إيه ؟؟
أيوة بكلم جد..هنروح فلسطين ...اسمعوا بس
أنا عندي خطة جاهزة و مجهزة كل حاجه ..بس فيه مشكلة..إييييييه يا بت..؟؟
ما بحبش حد يقولي يا بت..الله؟؟..احنا ناقصنا حاجه واحده بس.. أنا : ها إيه هي قولي
ناقصنا عربية تودينا...!!..أنا : بس كده؟؟
أنا هقول لبابا يودينا سهله أوى بس جهزي انتي الخطه..
...
بابا البت " ن" قالتلنا عاوزين نعمل حاجه لفلسطين ..
بابا احنا راحين على فلسطين؟؟ بس فيه مشكلة بص بقى ..احنا جهزنا الخطة أه بجد و كل حاجه !
فاضل بس عربية تودينا ! ها إيه رأيك؟؟ كله جاهز !! قولت إيه ؟؟

" منتهى البلاهه ساعتها ياخراشي ع الغبااء يا ولاااااه "

..... !
بلاش بقى قال إيه
" ده عبط أصلاً يعني إن جيتوا للحق!! "
D:
___

ياااه كانت أيام يا جدع والله..هو صراحه على ما وصلت ثانوي كنت عقلت عن كده كتيييييييير

يعني مثلاً ,
شتمت الأمن ف الإذاعة مرة ..
و اتخانقت مع المدير بتاع الوطني , قال بيعلق على إننا بنقول الله أكبر ولله الحمد و بنقول شعار الله غايتنا ف الإذاعه !
مش كفاية إنه ماكنتش بنزل المنهج ف الإذاعه , قال و كمان مش عاجبهم بتوع الحزب الوطني!!
عجايب و الله !

___

منشور هنا بتاريخ 30 \ 10 \ 2009

1 التعليقات:

Almogadded يقول...

القدس نادت يا شبابى لبوا الندا ....من غيركم يكون للقدس فدا .....صرخات طفل منكسر لها الصدا ....فى جوف الليل يعلو الصراخ ويعلو ولا ينقطع .... فقد الرضيع امه فى ساحات الردى .....متى تتوضأ ارض الانبياء بدماء اعدائها ..... فالحق منتصر وان مرت عليه السنين....هل ينفع النيران شيئا اذا فجرت الارض ينابيعها..... ارتجلت هذة الابيات الغير منظونة وانا فى ثانوى 2000 فى الاذاعة .....مدونة رائعة جعلتنى اتذكر ابيات من عشر سنوات