حدوته و حدوته

* كان يا مكان فيه حلم ..
و حلم يعني إيه ؟؟ يعني حاجات كتييير أوي ..
الحلم ده كان أأأأأأأأأد البذرة صغنوووون خالص خالص
صاحب البذرة دي كان بيحبها أوي أوي
و فضل عاينها معاه لحد ما يجي الوقت بتاعها و يزرعها ف مكانها
كان بيخاف عليها أوي لأنها جزء كبيييير جدا جدا من حياته
و كان مستعد يعيش حياته كلها عشانها
حاول مرة يزرعها و مرة و مرة
بس للأسف ف كل مرة تحصل حاجه تعطله عن إنه يزرعها
و كل حد يشوفها معاه يضحك عليه أو يسخر منه
و يقوله ما تحاولش دي مكانها مش هنا أرميها
قلييييل أوي ال كان جنبه
و يقوله لأ اوعى تتخلى عنها دي بتاعتك ما تسيبهاش أبداً
هو أصلاً مش بيهمه كلام حد و مؤمن بيها جدا جدا
بس قال هيعينها شوية ..
و يحافظ عليها زي ما هي لحد ماييجي وقتها و يزرعها
عانها .. و كان كل شوية بيبص عليها و يطمن عليها ..
يوم ورا يوم , شهر و را شهر, سنة ورا سنة
فين البذرة ؟ البذرة هنااااااك زي ما سابها ..
و هو فين هو هناااااا عايش بيقول إنه عايش ..
لكن هو نسيها وشغلته حاجات تانية ..
حاجات يمكن مهمه بس يمكن مش الأهم
يمكن مش وقتها و يمكن مش مكانها ..
يمكن بتتعبه .. و يمكن هتريحه ..
يمكن بيحبها .. و يمكن بيضحك على نفسه بيها ..
يمكن و يمكن و يمكن .. بقى مش عارف ..
بس ال عارفه إنه بيحن لبذرته أوي
و ال هي من أهم ال حاجات ف حياته , ده هي ال عايشلها
و عاوز يرجعلها تاني .. ع الأقل يبص عليها و يطمن عليها ..
عشان هو فعلاً فعلاً .. خايف عليها أوي لتضيع منه ..
و هو عارف إنها لو ضاعت منه
يبقى فعلاً هو ما كانش يستحق يشيلها لأنه مش قد مسئوليتها
و ساعتها هيعرف إن ال ما يحافظش ع البذرة بتاعته
و يراعيها و يشتغل بجد عشان يزرعها ..
يبقى يستاهل إنها تضيع منه ..



* كان يا مكان فيه نونو صغنون .. نونو مجنون ..
بيطير من غير جوانيح .. و بيطلع لفوووق , لفوووق , لفوووق
مش بيخاف أبداً أبداً .. لأنه ببساطه مش بيبص تحت ..
في مرة , بص تحت .. خاف .. ارتبك .. وقع .. اتكسر .. كسر كبييير!
بس ما ماتش .



* كان يا مكان فيه مكعب عاش طول عمره مكعب .. و ف الأخر اكتشف إنه عنده 6 أوجه و 12 ضلع !



* كان يا مكان فيه حرف ب و ح و ت .. وكمان حرف و حرف و حرف و كمان 3 حرف ..



* كان يا مكان فيه واحد بيحب ربنا أوي ..
ربنا عنده كبير و الناس صغيرين , وبعد كده الناس عنده كبيرة و الحاجات صغيرة
و ساعات الحاجات كبيرة و الناس الـ صغيرة !



* كان يا مكان فيه قفل .. و .. مفتاح ..
بس المفتاح ما بيفتحش القفل ..!



* كان يا مكان فيه .. "كان" و "سوف" .. بس "كان" في الماضي و "سوف" في المستقبل!